2018 оны 09-р сарын 21, Баасан гариг, 07 цаг 37 минут

Тэргүүлэгчдийн хуралдаанаас нийслэлийн иргэдээс нуух ямар шийдвэр гарав


Тэргүүлэгчдийн хуралдаанаас  нийслэлийн иргэдээс нуух  ямар  шийдвэр гарав

Муу нуухаар  сайн илчил гэдэгсэн.  Гэвч НИТХ-ын тэргүүлэгчид  өнөөдөр болсон ээлжит хуралдаанаар хэлэлцсэн зарим асуудлыг хаалттай хаалганы цаана хэлэлцэв.  

Тэргүүлэгчдийн хуралдаан хэзээнээс хэвлэл мэдээлэлд  нээлттэй болдог бөгөөд, Монголын хүн амын талаас илүү  нь шахуу амьдарч буй нийслэлийн иргэд, аж ахуйн нэгжтэй холбоотой шийдвэрүүд тэндээс гардаг.  

Тухайлбал,  өнөөдөр “Авто худалдааны нэгдсэн цогцолбор” орон нутгийн өмчит аж ахуйн тооцоот үйлдвэрийн газрын хараат бус гишүүдийг томилох эсэх асуудлыг хэлэлцэхдээ  тэргүүлэгчдээ “хаалгаа барив”. Учир нь авто худалдааны нэгдсэн цогцолбор хэзээнээс маргаантай сэдэв байсаар ирсэн. Тэндээс амьдрал ахуйгаа авч явдаг  сэлбэгийн наймаачид, машины ченжүүд, жижиглэн худалдаа эрхлэгчид, тэдний ар гэрийнхэн гээд хэдэн зуун хүнд уг асуудал хамаатай. Мөн нийслэлийн өмчит аж ахуйн нэгжийн хараат  бус гишүүний томилгоо ч олон нийтэд хамаатай. Гэтэл уг асуудлыг хэлэлцэх үеэр тэргүүлэгчдийн дуу чангарч, зарим нь хоорондоо маргалдаад эхэлсэн юм.

Дарга нар нь хурал дээрээ хэрэлдэхээр доод албатууд сэтгүүлчдийн нүд, чихийг дардаг жишиг Монголд л байдаг байх даа. Уг нь нийслэлийн иргэдээс цалинждаг дарга нар нийслэлийн өмчит үйлдвэрийн газрын “хараат бус” гишүүн шалгаруулах хурлаа олны хараанд хийх ёстойсон.

 

Т.Дөлгөөн

www.mongoltimes.mn