2018 оны 11-р сарын 15, Пүрэв гариг, 07 цаг 28 минут

Татвар төлөгчдийн мөнгөөр тансагласаар байх уу


    Татвар төлөгчдийн мөнгөөр тансагласаар  байх  уу

“Тээврийн хэрэгсэлд тусгай дуут болон гэрэл дохио тавьж хэрэглэх" журамд УИХ-ын гишүүн, Засгийн газрын гишүүн, Монгол Улсын сайд тусгай дуут болон гэрэл дохио хэрэглэхийг хориглосон байдаг.

Тэгвэл Хууль зүйн сайд Ц.Нямдоржийн төмөр хүлэг  сүүлийн өдрүүдэд олон нийтийн дургүйцлийг төрүүлээд зогсохгүй,  Засгийн газрын тогтоолыг давхар  зөрчсөн болох нь  тогтоогдлоо. Эрхэм сайдын шинэ машин ихээхэн төрүүлж буй 300 гаруй сая төгрөгийн үнэтэй бөгөөд, тусгай тоноглол, дугаар, дуут дохиотой.

Өнгөрсөн оны арванхоёрдугаар сард тусгай гэрэлт дохионы хэрэглээг хязгаарлах ажлыг Засгийн газраас хэрэгжүүлээд байхад Хууль зүй, дотоод хэргийн сайд өөрөө хуулиа зөрчих нь зөв үү?

Түүнчлэн улс орны эдийн засаг хүндхэн байгаа энэ үед тансаг хэрэглээний машин унаж байгаа нь хэр  ёс зүйт үйлдэл вэ гэдэгт шударга ёс хамгийн их ярьдаг Ц.Нямдорж сайд хариулт  өгч чадахгүй байна.  

Түүнээс О.Баасанхүү гишүүн 300 гаруй саяын үнэтэй машин унаж байгаа талаар Ц.Нямдоржоос асуухад тэрбээр "Энэ сүртэй зардал нэмэгдээд байх зүйл байхгүй" гэх тайлбарыг өгсөн.

Харин чуулганы дараа сэтгүүлчдийн асуусан асуултад "Саяхан манай яам хуучин машинууддаа зохицуулалт хийж шинэ машин авсан. Тэр машиныг нь би унаж байгаа нь үнэн" гэж хариулсан юм.

“Улсын мөнгө уйлдаггүй нь сайхан” гэж дарга нар  ярьдаг.  Гэхдээ эрхэм дарга нарын  унаа, хангамж,  тансаг зардалд  зарцуулж буй энэ мэт улсын мөнгийг аж ахуйн нэгж, иргэд  уйлах шахам ажиллаж байж татвараар төлдгийг  мартах  ёсгүй.   

Ц.Энхжин