2018 оны 09-р сарын 21, Баасан гариг, 07 цаг 09 минут

Гашуунсухайт авто зам: Гашуунсухайт боомтоор мягмар гарагт нүүрс тээврийн 915 автомашин гарсан


Гашуунсухайт авто зам: Гашуунсухайт боомтоор мягмар гарагт нүүрс тээврийн 915 автомашин гарсан

Мягмар гарагийн байдлаар Гашуунсухайт боомтоор 915 автомашин нүүрс тээвэрлэн гарсан талаар “Гашуунсухайт авто зам” ХХК мэдээллээ. Харин БНХАУ-ын нүүрсээ буулгасан 886 автомашин буцаж хилээр оржээ. Түүнчлэн Гашуунсухайт боомтод мягмар гарагийн 22.00 цагийн байдлаар 76 км урт дараалал үүссэн байна. БНХАУ-ын тал татан авалтаа нэмэгдүүлэх сонирхолтой байгаа гэдгийг "Гашуунсухайт авто зам" ХХК онцоллоо. Харин нүүрсний тээвэр хийж байгаа компаниудыг төлөөлж, "Монгол тээвэр нэгдэл" компани хил дээр үүссэн дараалал зарим тохиолдолд 140 км хүрч байгаа талаар мэдээллээ. “2018 он гарснаас хойш 4-6 дугаар сард Гашуунсухайт-Ганцмод боомтоор өдөрт дунджаар 850-950 тээврийн хэрэгсэл нэвтэрсэн. Засгийн газар өнгөрсөн зургаадугаар сард тогтоол гаргаж Тавантолгой-Гашуунсухайт чиглэлийн уртын тээврийг эхлүүлсэн. Ингэснээр Тавантолгой-Цагаан хад-Гашуунсухайт, Тавантолгой-Гашуунсухайт гэсэн маршрутаар нүүрс тээвэрлэж байна. Энэ нь Гашуунсухайтыг зорих автомашинуудын тоо нэмэгдэхэд нөлөөлсөн гэж "Монгол тээвэр нэгдэл" ХХК онцоллоо. Мөн хил дээр үүссэн дараалал нь БНХАУ-ын талын нүүрсний татан авалтаас шууд хамаарч байгаа гэж “Гашуунсухайт авто зам” ХХК мэдээллээ.