2018 оны 12-р сарын 19, Лхагва гариг, 09 цаг 15 минут

Багш нартай бүтэн жил учраа олж чаддаггүй “бяртай” Засгийн газраас өөр юу хүлээх вэ


Багш  нартай бүтэн  жил  учраа олж чаддаггүй “бяртай” Засгийн газраас өөр юу хүлээх вэ

Одоогоос  яг нэг  жилийн  өмнө УИХ-д  үнэмлэхүй олонх суудалтай МАН сонгуулийн үр дүнгээр байгуулсан Засгийн газраа огцруулж байлаа.  Ардчилсан хувьсгалаас  хойших Монголын  улс төрийн түүхэнд хамгийн  богино настай буюу ердөө  1.2 жил  бүрэн  эрхээ хэрэгжүүлсэн  Засгийн газар Ж.Эрдэнэбатынх болсон нь  тэр.  Гэхдээ энд огцорсон  Засгийн газрыг  онцлох  гэсэнгүй,  оронд  нь  байгуулагдсан  өнөөгийн  Засгийн газрын үйл  ажиллагаанд  үнэлэлт  дүгнэлт  өгөх цаг  нь болсныг  хэлэх  гэсэн юм.  

Ерөнхий сайд  У.Хүрэлсүх 100 хувь  давхар дээлтэй Засгийн газар  байгуулсныхаа дараа “Бяртай сайдуудаар  багаа бүрдүүллээ” хэмээн хэлж байсан.  Энэ  нь  Засгийн газраас гарсан  бодлого  шийдвэрээ парламент дээр ногоон гэрлээр шийдүүлээд,  ажлыг  шижигнүүлээд  байна гэсэн  утгаар  хэллээ гэж ард түмэн ойлгосон. Гэвч  “Засагт ажиллана гэдэг загасанд явахтай адилгүй” гэдэг шиг бяртай сайдуудтай У.Хүрэлсүхийн кабинет бодлогын түвшний, олигтойхон шийдвэргүй,  барьж аваад  эхлүүлсэн  томоохон ажилгүй нэг  жилтэйгээ золгох гэж байна. 

Дүлэгнэсэн, бөөрөнхийлсөн, арьсаа хамгаалсан манж маягийн хариулттай, хүлээлт эргэлзээ төрүүлсэн ажлын арга барилаар  энэ Засгийн газар  ажиллаж байна.  Үүний  хамгийн тод  жишээ нь  өнөөдөр төв талбай дээр суулт  зарлаж буй  багш нарын  ажил  хаялт  юм.  У.Хүрэлсүхийг  танхимаа бүрдүүлэх  үетэй зэрэгцэж шахуу эхэлсэн төрийн  албан хаагчдын цалингаа нэмүүлэх  шаардлага,  эсэргүүцлийн  тэмцэл  өнөөдөр  ч үргэлжилж байна. 

Багш  нар  өнгөрсөн  жилийн намар ажил  хаялт зарлан,  цалин  нэмэх шаардлага тавин  хэлэлцээрийн ширээний ард Засгийн газартай хамт  сууж байсан.  Бүтэн  жил  үргэлжилсэн  талуудын  хэлэлцээр  өнөөдөр ч амжилтад  хүрээгүй,  ажил  хаялтаар үргэлжилж байгаа нь  энэ Засгийн газраас  ихийг  хүлээх хэрэггүйг  баталж байна. 

Харин ч асуудлыг зөвшилцөл, хэлцлээр шийдэхийн оронд сүрдүүлж, номхруулах гэж оролдож байгаа нь нийгэмд таагүй уур амьсгал үүсгэж байгааг салбар удирдсан хатагтай Ц.Цогзолмаа,  засаг тэргүүлсэн  ноён  У. Хүрэлсүх  хоёр  мэдэрч байгаа болов уу, ер нь.  

У.Хүрэлсүхийн  Засгийн газар  цалингаа нэмүүлэх гэсэн  хэдэн  багш  нартайгаа учраа олохгүй бүтэн нэг жил ухантаж байх  зуур  Монголын  эдийн засаг идэвхгүй,  урагшгүй байдал  үргэлжилсээр.  

Улсын төсөв давж биелэсэн,  олсон орлогоороо  өр  дарж байна гэж өдөр бүр  шахуу зурагтаар  ярьж буй Сангийн сайд  Ч.Хүрэлбаатарт ирэх  жилүүдэд ирэх сорилтод бэлэн бодлого  байна уу. 

Үнэндээ Засгийн газар сайн  ажилласандаа бус  өнгөрсөн хэдэн сар биднийг баярлуулсан, гадаад зах зээлийн гэнэтийн “бэлэг”-үүд л  Монгол  Улсын  төсөв давж биелэхэд нөлөөлсөн.  Харин  ирэх  жил  энэ сюрпризүүд  замхарч, дотоод эдийн засгийн нөөц боломж ч алдагдана гэдгийг  эдийн засагчид  өнгөрсөн долоо хоногийн  турш  болсон  чуулга уулзалтууд /Coal  mongolia, Discover mongolia/-ын  үеэр  сануулж байлаа. 

2020 он ойртох тусам Монгол Улсын сорилт нэмэгдэнэ. ОУВС-гийн хөтөлбөрийн хугацаа дуусна. Араас залгаад улс төрийн сонгууль болж, өдгөө хойшлуулж буй өр зээлийн эргэн төлөлт сөхөгдөнө гэж дэлхийд  хүлээн зөвшөөрөгдсөн Fitch агентлагийн Ази Номхон далайн орнуудын Зээлжих зэрэглэл хариуцсан захирал Эндрью Феннел дүгнэж байна. 

Үнэндээ энэ Засгийн газар эрийн сайндаа эдийн засгийг өсгөчихөөгүй. Аз ч гэж хэлж болох, гадаад зах зээлийн /худалдааны дайн, манай хоёр хөршид  бусад  орноос үзүүлсэн  хориг зэрэг/ гэнэтийн хүчин зүйлс энэ Засгийн газрыг өдгөө даналзаж, сайд дарга нар өсөлт ярихад хүргэсэн. Тэгвэл өнгөрсөн оны сүүлчээс энэ оны эхэн хүртэл биднийг баярлуулсан гадаад зах зээл ирэх онд ч нүүр бууруулна гэдгийг эдийн засагчид,  хөрөнгө оруулагч,  бизнес эрхлэгчид  ам  уралдан анхааруулж буйг ноён У.Хүрэлсүх танд  сануулъя. 

 

С.Нарангарав

www.mongoltimes.mn